Bachelor i økonomi og administrasjon, Sogndal

Emna som er inkludert i bachelorprogrammet skal samla bidra til at studentane oppnår følgjande læringsutbytte på studiprogramnivå:

KUNNSKAP

Kandidaten:

har brei kunnskap om sentrale tema, teoriar, problemstillingar, prosessar, verktøy og metodar innafor det økonomisk-administrative fagområdet.

har kunnskap om korleis kapitalmarknadane og verdipapir fungerer, korleis verksemder vert finansiert og korleis investeringar vert vurdert.

har kunnskap om bruk av økonomiske styringsverktøy og korleis rekneskap vert utarbeida, rapportert og analysert.

har kunnskap om korleis verksemder utviklar og iverkset strategiar, korleis dei vert organisert og leia, samt korleis produkt og tenester vert marknadsført og posisjonert.

forstår korleis marknaden fungerer, korleis konsumentar og produsentar gjer sine val og korleis desse vert påverka av økonomisk politikk, teknologi og internasjonale rammevilkår.

har innsikt i korleis verksemder vert starta, utvikla og endra i tråd med behov, juridiske rammer og forventningar i samfunnet, slik som til dømes berekraft, globalisering, innovasjon og teknologiutvikling, samt den nordiske arbeidslivsmodellen sin verknad for arbeids- og næringsliv.

kjenner til korleis verksemder utøver sin aktivitet på ein etisk forsvarleg måte for å ivareta sine interessentar og samtidig fremje FN sine berekraftsmål.

har eit godt metodegrunnlag i matematikk, statistikk og samfunnsvitskapleg metode, samt forstår korleis metodiske verktøy vert brukt i samband med å hente inn, organisere og analysere data.

kjenner til fagområda si historie, tradisjonar, eigenart, plass i samfunnet, samt forskings- og utviklingsarbeid.

FERDIGHETER

Kandidaten:

kan nytte fagleg kunnskap og relevante resultat frå forskings- og utviklingsarbeid på praktiske og teoretiske problemstillingar samt grunngje sine val.

kan analysere økonomisk-administrative problemstillingar ved hjelp av eigna teori og empiriske metodar.

kan gjennomføre ei kritisk vurdering av usikkerheit ved eigne analyser.

evner å kommunisere innhaldet i analyser, metodeval, resultat og føresetnadar både munnleg og skriftleg.

kan nytte arbeidslivsrelevante digitale verktøy, teknikkar og uttrykksformer.

kan vurdere ulike typar risiko og konsekvensar av avgjersle.

kan nytte ulike faglege perspektiv og teoretiske tilnærmingar for å forstå korleis verksemder fungerer.

er i stand til å integrere omsyn til berekraft i verksemda sin forretningsmodell og praksis.

GENERELL KOMPETANSE

Kandidaten:

er medviten sine eigne verdiar og korleis desse verkar inn på eigen aktivitet og slutningar.

viser evne til kritisk tenking og etisk refleksjon.

forstår korleis problemstillingar, prosessar og avgjersle verkar inn på ressursar, kontekst og verdisett.

har grunnlag til å bidra til langsiktig verdiskaping for verksemder og samfunn.

har grunnlag for å operere i ein internasjonal arbeidsmarknad.

kan samarbeide i ulike kontekstar og på tvers av fagområde.

har grunnleggjande forståing av IT- system og -prosessar, og korleis desse kan bidra til forretningsutvikling og verdiskaping.

skal bidra til å fremje verksemder sin innovasjons- og omstillingsevne i ein omskifteleg arbeidsmarknad.

Arbeidsformene på studiet vekslar mellom forelesingar, diskusjonar, seminar, gruppeøvingar og kollokviegrupper med rettleiar. Studiet nyttar problembasert læring med vekt på oppgåver som er aktuelle og relevante for verksemder både i dag og i framtida. Studiet føreset at kandidaten er til stade i Sogndal og enkelte emne kan innehalde obligatoriske aktivitetar.

Det vert lagt opp til ein studietur i 2. eller 3. klasse med besøk hjå verksemder og institusjonar. Studentane må rekne med eigenbetaling. For studentar som ikkje har høve til å delta i undervisning som krev eigenbetaling, tilbyr høgskulen alternativt undervisningsopplegg som tilfredsstiller dei faglege krava.

For å følgje undervisning og gjennomføre eksamenar i studiet, må studentane disponere eigen berbar datamaskin med standard programvare.

• Rådgivings- og spesialistoppgåver knytt til økonomi og administrasjon innan privat næringsliv, som til dømes bank, forsikring, revisjon, konsulentverksemd og reiseliv.
• Rådgivings- og spesialistoppgåver knytt til økonomi og administrasjon innan offentleg forvaltning og andre organisasjonar.
• Mellomleiar og leiar i privat og offentleg sektor.
• Etter to års relevant praksis og nokre spesifikke valemne kan du søke Finanstilsynet om autorisasjon som rekneskapsførar. Emna du må velje finn du i studieplanen.

Studiet gir kandidatane ein brei kompetanseplattform innanfor det økonomisk- administrative fagområdet og byggjer på tilrådd nasjonal plan frå Universitets og Høgskulerådet (UHR) sin fagstrategiske eining for økonomi og administrasjon. Korleis ein skapar og forvaltar verdiar i eit langsiktig perspektiv står sentralt i studiet. Kandidatane får difor kunnskap om korleis private og offentlege verksemder tek avgjersler for å koordinere og optimalisere bruken av knappe ressursar for å nå verksemda sine mål. Vidare lærer kandidatane både å forstå dei samfunnsmessige verknadane av verksemdene sine avgjersle og korleis samfunnsmessige endringar påverkar verksemder og deira avgjersle. Studiet gir også kandidatane innsikt i forskings- og utviklingsarbeid innan fagområdet slik at dei har oppdatert kunnskap om teoriar og metodar.

Studiet bidreg til å utvikle kandidatane si kritiske tenking og gir grunnlag for vidare studiar på masternivå. Studiet er spesielt tilpassa masterstudiet i økonomi og administrasjon (som gir sidetittelen siviløkonom). Ved å velje emne innan finansrekneskap, skatte- og avgiftsrett, rettslære og bacheloroppgåve i rekneskap, kan studentane etter tre års relevant praksis søke Finanstilsynet om autorisasjon som statsautorisert rekneskapsførar.

For å kunne skrive bacheloroppgåve i 5. semester må følgjande vilkår vera oppfylt:

Bestått minst 90 studiepoeng før undervisningspåmelding i haustsemesteret.

For studentar som skal skrive bacheloroppgåve innan rekneskap må minimum 30 studiepoeng vera knytt til spesialisering for regnskapsførere.

Minimum godkjent obligatorisk læringsaktivitet i BØA115 Statistikk.

Utdanninga passar godt for deg som ønskjer å jobbe med rådgivings- eller spesialistoppgåver knytt til dei økonomiske, organisatoriske eller administrative delane av ein privat eller offentleg organisasjon.

Du lærer

• å utarbeide og analysere rekneskap
• korleis produkt og tenester kan utviklast og marknadsførast
• om finansiering av verksemder, vurdere nye investeringar og kunne analysere inntekter og kostnader
• å gjennomføre strategiske analyser

Du har emne som bedriftsøkonomi, leiing og strategi, matematikk, marknadsføring, samfunnsøkonomi, forretningsjus, etikk, samfunnsansvar og berekraft.

Undervisningsmåtar

Vi har forelesingar, seminar, gruppeøvingar og organiserte kollokviegrupper med rettleiing. Vi koblar teori og praksis gjennom arbeid med relevante problemstillingar.

Forkurs i matematikk

Det vert arrangert forkurs i matematikk i veke 32 (9.–13. august) for 1. klasse. Har du berre P-matte frå vidaregåande skule, er du sterkt oppmoda om å delta. Er du usikre på eigne matematikkkunnskapar og har behov for oppfrisking av kunnskapar, bør du og delta på forkurset. Du vil få meir informasjon om forkurset i opptaksbrevet.