Friluftsliv, bachelorstudium, Sogndal

Etter fullført bachelor i friluftsliv skal kandidaten ha følgjande totale læringsutbytte definert i kunnskapar, ferdigheiter og generell kompetanse:

Kunnskapar

Studenten

• har brei kunnskap om sentrale tema og problemstillingar innan friluftsliv og læring
• har brei kunnskap om å planlegge, rettleie og evaluere friluftsliv i ulike kontekstar
• har kunnskap om friluftsliv og idrett si historie, filosofi, tradisjonar, verdiar, eigenart og plass i samfunnet
• kjenner til forskings- og utviklingsarbeid og kan oppdatere kunnskapen sin på sentrale område innan fagfeltet friluftsliv
• har brei kunnskap om vitskaplege arbeidsmetodar og ulike typar kjelder

Ferdigheiter

Studenten

• kan grunnleggande praktiske ferdigheiter i friluftsliv, med utgangspunkt i norsk friluftslivstradisjon
• kan bruke sine faglege kunnskapar og spesifikke ferdigheiter knytt til nærfriluftsliv, bre, fjell og fjord til ulike årstider
• kan observere, analysere og reflektere over sentrale element i praktiske og teoretiske oppgåver
• kan gjennomføre eit avgrensa forskingsarbeid under rettleiing i tråd med gjeldande forskingsetiske normer og reglar
• kan finne, vurdere og bruke ulike kunnskapskjelder og meistre referansehandtering, siteringsteknikk og kjeldekritikk
• kan meistre bruk av digitale hjelpemiddel innan fagområdet friluftsliv
• kan delta aktivt i samskapande og nyskapande prosessar
• kan igangsette, utføre og leie førstehjelp og kameratredning ute i naturen

Generell kompetanse

Studenten

• kan planlegge og leie friluftslivsaktivitetar i samsvar med myndigheitene sine krav om helse, miljø og sikkerheit
• kjenner til friluftslivsvegledning som metode for leiing og læring
• kan samhandle og kommunisere med individ, grupper og samfunnsaktørar innan fagområde friluftsliv
• har evne til å framstå profesjonelt og reflektere over eigne haldningar og etisk medvit i eit berekraftperspektiv
• kan sjølvstendig fortsette eigen kompetanseutvikling og spesialisering innan praksisfeltet til friluftsliv
• kjenner til og kan ta del i nytenking og innovasjonsprosessar innan fagområdet

Bachelor i friluftsliv gir deg solid kompetanse til å arbeide med menneske og grupper i naturen. Studieprogrammet er ei brei friluftslivsutdanning der du fordjupar deg i friluftsliv knytt til ulike kontekstar. I utdanninga får du teoretisk og praktisk kunnskap om friluftslivsvegledning, trygg ferdsel i naturen og korleis friluftsliv verkar inn på individ, grupper og samfunn. Du tileignar deg kompetanse og ferdigheit med å planlegge, legge til rette for, leie og evaluere friluftsliv for ulike målgrupper.

Utdanninga passar godt for deg som vil jobbe med friluftsliv generelt, friluftsliv på folkehøgskule, friluftsliv i helsesektoren, med naturbasert turisme eller studere vidare for å få undervisningskompetanse i skuleverket. Studiet nyttar nærområda som læringsarena for å til dømes ivareta berekraft i og til natur. Frå campus er det korte avstandar til ulike naturtypar. Dei markante årstidene i området er godt eigna til nærfriluftsliv på barmark og snø, vandring i høgfjellet og meir spesialiserte kontekstar som brevandring, klatring, havpadling, nordisk og alpin skiferdsel. Studiet har eit berekraftfokus, i nærleik til natur og med hensikt å utdanne studentar til relevant arbeid i natur etter avslutta studie. Utdanninga gjev deg moglegheit til å sertifisere deg innan førstehjelp, klatring, havpadling, nordisk- og alpin skiferdsel.

Tilrådde forkunnskapar er å vere i god nok fysisk form til å kunne bere eige og felles utstyr på ekskursjonar med overnattingar på barmark og på snø. Det er krav til søkaren at ein skal kunne symje.

Studieprogrammet kvalifiserer til opptak på master i idrettsvitskap (karakterkrav C) og master i samhandling og folkehelse (karakterkrav C) og master i sosialvitskap, studieretning samfunnsarbeid og studieretning miljøterapeutisk arbeid (sjå eigne opptakskrav). Ein kan også å søke opptak til praktisk-pedagogisk utdanning (karakterkrav C) ( sjå eigne opptakskrav) ved HVL. Etter fullført masterutdanning kan ein kvalifisere seg vidare til opptak på doktorgradsprogram ved HVL.

Det er innlagt praksis i andre studieår:

I emnet Friluftsliv vinter 1 er det to veker samanhengande arbeidslivsretta praksis.

Døme på denne praksisen kan være friluftslivsundervisning i skulesamanheng, friluftsliv i institusjonssamanheng, DNT, friluftslivsråd, eller inn mot naturguiding i naturbaserte reiselivsbedrifter.

Studiet inneheld ein praksisperiode. To veker 2. studieår som er knytt til friluftslivsundervisning i skulesamanheng og bruk av friluftsliv i institusjonssamanheng knytt til fysiske- og psykiske helseutfordringar.

Informasjon om praksis.

Ved campus Sogndal har du den flotte naturen rett utanfor døra. Som friluftslivstudent får du bruke fjorden og fjella som ein naturleg del av utdanninga di, mellom anna gjennom fordjuping i aktivitetar som ski, klatring, havkajakk og brevandring.

 Gjennom teori, praksis og ekskursjonar får du ei utdanning som gjer at du kan inspirere andre og gje gode naturopplevingar til menneske i ulike aldrar og livssituasjonar.

Den korte vegen til Sogndalsfjella, Sognefjorden og Jotunheimen, lang snøsesong og gode lærings- og treningsfasilitetar på campus, dannar ei unik ramme for klasseromma vi brukar i utdanninga.

Gjennom studiet lærer du:

• å planlegge og gjennomføre turar i ulike miljø (padling, klatring, ski, bre og fotturar)
• å tilpasse turar for ulike grupper og med ulike ferdigheiter
• grunnleggande praktiske ferdigheiter i friluftsliv sommar og vinter
• om teoretisk perspektiv på friluftslivets historie, friluftsliv i dagens samfunn, naturfilosofi, friluftslivspedagogikk og -forvaltning.
• å bruke vitskapleg litteratur i arbeid med bacheloroppgåva og andre oppgåver

Har du årsstudium i idrett, personleg trenar eller anna relevant utdanning, kan du søke opptak direkte til 2. studieår. Du søker opptak til 2. år gjennom vår Søknadsweb.

• Med årsstudium i praktisk-pedagogisk-utdanning blir du kvalifisert for å undervise frå 5. til 13. trinn.
• Du kan også bygge på utdanninga di med master i idrettsvitenskap ved HVL, eller ta andre relevante masterutdanningar ved ulike høgskular og universitet.