Historie, bachelorstudium - nettstudium

Læringsutbytte

Ein kandidat med fullførd kvalifikasjon skal ha følgjande totale læringsutbytte definert i kunnskap, ferdigheiter og generell kompetanse:

Kunnskap

Kandidaten

har brei realhistorisk kunnskap om norsk, europeisk, og global historie, og ei djupare forståing av einskilde historiske emne

har inngåande kjennskap til endringsprosessar i samfunnet over korte og lange tidsspenn

har kunnskap om økonomisk og teknologisk utvikling, og om sosiale og kulturelle endringar over tid

har historisk kunnskap om politiske institusjonar og ideologi, krig, diplomati og rettsutvikling

har kjennskap til kva som kjenneteiknar norsk og europeisk historie i komparative perspektiv

kjenner til sentrale teoriar og metodar som vert nytta i historisk forsking, og kan nytte desse i eigne, sjølvstendige arbeid

kjenner til ulike forklaringar og fortolkingar som vert nytta til å forstå viktige hendingar og utviklingstrekk i historia

kjenner til ulike perspektiv på kjønn i historia

har kunnskap om historiefaget si historie og eigenart, og kva roller historia og historikaren kan ha i samfunnet

kan oppdatere kunnskapane sine og vurdere nytt fagstoff

Ferdigheiter

Kandidaten

kan nytte historiefagleg kunnskap til å orientere seg kritisk i ei stor informasjonsmengd og drøfte kompliserte årsak- og verknadssamanhengar i analytiske skriftlege framstillingar

kan reflektere over eiga fagleg verksemd og justere denne under fagleg rettleiing

kan drøfte korleis menneska sin situasjon under skiftande samfunnstilhøve har variert gjennom ulike historiske epokar, frå stad til stad, og mellom ulike grupper

kan finne fram til, vurdere, og analysere historiske data, kjelder og litteratur og trekke sjølvstendige konklusjonar slik at det kastar lys over ei problemstilling

kan drøfte historiske problemstillingar og formidle eige forskingsarbeid munnleg og skriftleg

kan forstå historisk forskingsdebatt og reflektere kring vitskaplege grunnlagsproblem

kan meistre kronologi, kjeldekritikk, hermeneutikk, og andre faglege verktøy

kan bruke digitale verktøy til å hente informasjon frå ulike medium og vurdere den kjeldekritisk i eigne framstillingar

Generell kompetanse

Kandidaten

har innsikt i korleis historia kan brukast og misbrukast, og dei etiske sidene ved historisk forsking og formidling

har innsikt i dei analytiske, fortolkande og kreative prosessane som ligg bak skapinga av ny historisk kunnskap

kan argumentere rasjonelt og logisk, i samsvar med vitskaplege kriterium

kan tenkje kritisk, langsiktig og heilskapleg

kan planlegge og gjennomføre større prosjekt

kan setje seg inn i situasjonen til andre menneske, på tvers av tid, stad, og kultur

kan nytte historisk kunnskap og forståing til å forstå samtida og ta avgjerder

kan nytte historiske teoriar og metodar til å fortolke ny informasjon og forstå endringar i samfunnet

kan formidle sentralt fagstoff til ulike publikum, og utveksle synspunkt og erfaringar med andre

kan nytte kunnskap om historiske nyvinningar og innovasjonar til å forstå og bidra til innovasjonsprosessar i dagens og framtidas samfunn

Det vert nytta ulike vurderingsformer, som heimeeksamen, munnleg eksamen, skriftlege og munnlege oppgåver av varierande storleik og bacheloroppgåve med munnleg etterprøving. Alle eksamensinnleveringar skjer i det internettbaserte eksamensverktyet til HVL (for tida WiseFlow). Sjå detaljar under emneplanane.

Til munnleg eksamen blir det nytta videosamtale.

Studiet set store krav til sjølvstendig arbeid med stoffet. Studiet er lagt opp som eit reint nettstudium med Canvas som den sentrale læringsplattforma. Noko av undervisninga føregår som førelesingar («live») og gruppearbeid ved hjelp av nettkonferanseverktøy. Det vil også bli tilbydd digitale ressursar som videoopptak av undervisning og/eller podcast, og det vil bli gjeve øvingsoppgåver og lagt til rette for studentstyrte kollokviegrupper på nett. Skriftlege innleveringar blir kommenterte av faglærar og medstudentar.

Studiet krev at ein har ei datamaskin med godt internettsamband, webkamera, mikrofon og vanleg programvare til skriving og kommunikasjon, og at ein er kjent med vanleg datamaskin- og internettbruk. Ei vanleg moderne datamaskin er nok til å handtere dei digitale verktya som vil bli brukte, men eldre maskinar kan skape problem. Det vil bli gjeve opplæring i bruk av dei digitale verktøya ved studiestart.

Kompetansen du får med ein bachelor i historie er stadig meir etterspurd av arbeidsgjevarar: å kunne tenkje sjølvstendig, forstå endringsprosessar i samfunnet og tileigne seg, analysere, systematisere og formidle store informasjonsmengder.

Du kan mellom anna jobbe med:

• prosjektarbeid, rådgiving, opplæring og saksbehandling i offentlig og privat sektor
• strategi-, analyse- og informasjonsarbeid i næringslivet
• arkiv, museum, media og forlag
• lærar (krev master og PPU)
• kommunikasjon, marknadsføring og nye media
• kultur, underhaldning og reiseliv
• politikk, organisasjonar, internasjonalt arbeid, stiftingar og tenkjetankar
• sjølvstendig arbeid som konsulent, frilansar eller gründer

Les meir og sjå kva tidlegare historiestudentar arbeider med.

Historie eit rikt og mangfaldig studium. Som historiestudent studerer du samfunnslivet i all si breidde: frå politikk, økonomi og teknologi til kultur, idear, og sosiale forhold. Du vil besøke mange ulike tider og stader, og sjå hendingar i heile spennet frå eit individperspektiv til det globale fugleperspektivet.

På eit vis handlar historie om frigjering: du trer ut av din eigen situasjon i tid og rom, og prøver å forstå korleis menneske i fortida tenkte og handla, og kvifor. Ei djup historisk forståing kan gje ny meining til samtida og ny retning til eige liv. Studiet av historisk variasjon i institusjonar kan samtidig gi deg innsikt i kva som har fungert og ikkje i fortida. Då får du eit sjølvstendig grunnlag for å meine noko om kva for system og tiltak som er moglege, nødvendige eller rettvise i dag.

Med ein bachelor i historie har du mange ferdigheiter som er etterspurde i arbeidslivet. Arbeidsgjevarar etterspør studentar som kan tenkje sjølvstendig, kritisk, heilskapleg, og langsiktig. Dei ser også etter kandidatar som kan hente inn og analysere store og komplekse informasjonsmengder og deretter samle og presentere ny kunnskap. Ikkje minst er det viktig for arbeidslivet å ha folk som forstår endringsprosessar i samfunnet og kan handtere store kulturforskjellar.

Bachelorprogrammet i historie er lagt opp slik at du kombinerer brei læring om norsk, europeisk og global historie frå dei eldste tider og fram til i dag med ulike val- og fordjupingsemne. I tillegg får du skrive ei bacheloroppgåve om eit historisk emne du er spesielt interessert i. Noko av det unike med dette studiet er at ein del av læringa dreier seg om korleis historia blir brukt i dagens samfunn.

Det første og tredje studieåret følgjer eit obligatorisk løp. I det valfrie andreåret tilbyr Handelshøgskulen HVL fordjupingsemne i historie og andre samfunnsfaglege emne som høver godt inn i bachelorgraden. Du står elles fritt til å velje eit årsstudium eller setje saman ulike emne, anten ved HVL eller ved andre utdanningsinstitusjonar innan- eller utanlands.

Kva kan du jobbe med?

Historiefagleg utdanning kan opne for mange ulike moglegheiter i arbeidslivet. Nokre døme:

Prosjektarbeid, rådgjeving, opplæring og saksbehandling i offentlig og privat sektor

Arkiv og museum

Media og forlag

Kultur, underhaldning og reiseliv

Politikk, organisasjonar og internasjonalt arbeid

Stiftingar og tenketankar

Strategi-, analyse-, og informasjonsarbeid i næringslivet

Kommunikasjon, marknadsføring og nye media

Sjølvstendig arbeid som konsulent, frilansar eller gründer

Med bachelor i historie kan du søkje opptak på masterstudium i historie ved andre institusjonar.

Grip sjansen til å oppleve verda medan du studerer! Det er tilrettelagt for studieopphald i utlandet i 3. og/eller 4. semester.

All undervisning skjer på nett, og studiet føreset at ein har datamaskin med internettilknyting, videokamera, mikrofon og vanleg programvare til skriving og kommunikasjon. Undervisninga skjer ved hjelp av læringsplattforma Canvas og nettkonferanseverktøy.

Vi har nettforelesingar, gruppediskusjonar, oppgåveskriving med rettleiing, øving i formidling til ulike målgrupper og arbeidspraksis for dei som ønskjer det. Nettstudentar har også høve til å delta på førelesingar, seminar, ekskursjonar og andre undervisningsaktivtetar på dei tilsvarande campusemna i Sogndal. Campus- og nettstudentane følgjer same løp, og noko av undervisninga vil bli samordna.

Historiefaget set store krav til kjeldekritikk, og vi har fokus på logisk tenking, rasjonell argumentasjon, kritisk analyse av tekstar og tydeleg kommunikasjon.

Det er lagt opp til mykje sjølvstudium.

Studiet er bygd opp av dei følgjande obligatoriske og valfrie emna. Dei fleste emna er på 10 studiepoeng, og dei er som hovudregel bolka slik at ein gjer unna undervisning og eksamen i eitt emne før ein tek til på det neste. På hausten vil det seie at emne 1 går i august–september, emne 2 i oktober–november og emne 3 i november–desember. På våren vil emne 1 gå i januar–februar, emne 2 i februar–mars og emne 3 i april–mai/juni. Unntak frå dette er Bacheloroppgåva (15 studiepoeng) og det påfølgjande kortare emnet Historiefagleg kommunikasjon (5 studiepoeng). Nøyaktig periode for bolkane blir fastsett i timeplan og eksamensplan og vil variere noko frå studieår til studieår.

1. studieår 2026/27 (obligatoriske emne)

Haust (1. semester)

• Emne 1: SA597 Danning og akademisk handverk - historie (10 studiepoeng)
• Emne 2: SA603 Historia i samfunnet (10 studiepoeng)
• Emne 3: HI101 Historie 500–1500 (10 studiepoeng)

Vår (2. semester)

• Emne 1: HI102 Historie 1500–1800 (10 studiepoeng)
• Emne 2: HI103 Historie 1800–1930 (10 studiepoeng)
• Emne 3: HI104 Historie etter 1930 (10 studiepoeng)

Første studieår er identisk med historie årsstudium.

2. studieår 2027/28 (valfrie emne)

Handelshøgskulen HVL tilbyr desse valfrie emna for dei som vil ta standardforløpet:

Haust (3. semester)

• Emne 1: SAxxx Historie fordjuping (10 studiepoeng)
• Emne 2: SAxxx Historie fordjuping (10 studiepoeng)
• Emne 3: SAxxx Barndommens og ungdommens historie (10 studiepoeng)

Vår (4. semester)

• Emne 1: SA589 Komparativ politikk (10 studiepoeng)
• Emne 2: SA590 Internasjonal politikk(10 studiepoeng)
• Emne 3: SAxxx Historie fordjuping (10 studiepoeng)

Det blir fastsett våren 2027 kva fordjupingsemne som blir tilbydd hausten 2027 og våren 2028.

Emna i vårsemesteret er samordna med sosiologi bachelor og samfunnsfag årsstudium, og her kan det bli justeringar.

Som alternativ til eitt eller fleire av desse emna står ein fritt til å velje andre emne som går på Handelshøgskulen HVL studieåret 2027/28.

Ein kan også ta dei 60 valfrie studiepoenga ved andre institutt/fakultet ved HVL eller på andre universitet og høgskular. Sjå meir om dette under "Innhald".

3. studieår 2028/29 (obligatoriske emne)

Haust (5. semester)

• Emne 1: SAxxx Historie fordjuping (10 studiepoeng)
• Emne 2: SAxxx Historie fordjuping (10 studiepoeng)
• Emne 3: SAxxx Historie fordjuping (10 studiepoeng)

Det blir fastsett våren 2027 kva fordjupingsemne som blir tilbydd hausten 2027.

Vår (6. semester)

• Emne 1: SA606 Historievitskapleg metode (10 studiepoeng)
• Emne 2: SA523 Bacheloroppgåve i historie (15 studiepoeng)
• Emne 3: SA607 Historiefagleg kommunikasjon (5 studiepoeng)

Innsikt i fortida er avgjerande for å forstå kva som skjer i dag, frå dei store globale spørsmåla til lokalsamfunnet du tilhøyrar. Du forstår meir om kvifor menneske i fortida tenkte og handla som dei gjorde.

Du studerer alle sider av samfunnet – frå politikk, økonomi og teknologi til kultur, idear og sosiale forhold, og du får trening i å skrive fagtekstar. Du får også høve til å skaffe deg verdfull praksis frå arbeidslivet.

Bachelor i historie kan du også ta som campusstudium.

Du lærer

• om eldre og nyare historie, norsk, europeisk og global historie og lokalhistorie
• om globalisering og korleis ulike samfunn har møtt utfordringar som framleis er dagsaktuelle, som konsekvensar av konflikt og migrasjon, teknologisk utvikling og utfordringar knytt til klima- og miljøendringar
• historievitskapleg metode og kjeldekunnskap og blir betre rusta til å avsløre falske nyhende
• korleis du kan bruke og formidle historiefagleg kunnskap gjennom skriving og yrkespraksis

Møt faglærarane og høyr dei fortelje om kva dette studiet går ut på.

I det valfrie studieåret står du fritt til å velje eit årsstudium, eller setje saman ulike emne frå HVL eller andre utdanningsinstitusjonar innan- eller utanlands. Dersom du har 60 studiepoeng frå før, kan du søkje om å få dette årsstudiet/emna innpassa. Elles kan du velje tilgjengelege campus- eller nettstudium. I fordjupingsåret skriv du bacheloroppgåve om eit historisk emne du interesserer deg for.

1. studieår er identisk med historie årsstudium. Med fullført årsstudium i historie kan du søkje opptak direkte til 2. år. Du søker gjennom vår Søknadsweb.

Undervisningsmåtar

All undervisning skjer på nett, og studiet føreset at ein har datamaskin med internettilknyting, videokamera, mikrofon og vanleg programvare til skriving og kommunikasjon. Undervisninga skjer ved hjelp av læringsplattforma Canvas og nettkonferanseverktøy.

Vi har nettforelesingar, gruppediskusjonar, oppgåveskriving med rettleiing, øving i formidling til ulike målgrupper og arbeidspraksis for dei som ønskjer det. Nettstudentar har også høve til å delta på førelesingar, seminar, ekskursjonar og andre undervisningsaktivtetar på dei tilsvarande campusemna i Sogndal. Campus- og nettstudentane følgjer same løp, og noko av undervisninga vil bli samordna.

Historiefaget set store krav til kjeldekritikk, og vi har fokus på logisk tenking, rasjonell argumentasjon, kritisk analyse av tekstar og tydeleg kommunikasjon.

Det er lagt opp til mykje sjølvstudium.

Du er endå betre rusta for arbeidslivet om du tek ein master. Historie bachelor kvalifiserer for opptak på historie master og somme andre masterstudium ved norske og utanlandske universitet og høgskular. Ved ein del masterstudium er det krav om ex.phil. og ex.fac. Dette kan du ta i det valfrie studieåret.

Med master kan du ta praktisk-pedagogisk utdanning og bli lærar.