NORD1106 Språkhistorie og talemål

Kunnskap:

Kandidaten har kunnskap om:

• ulike periodar i norsk språkhistorie og grunnlaget for inndelinga
• sentrale trekk i norrøn språkstruktur
• språkplanlegging og normeringshistorie etter 1814
• tradisjonelle norske dialektar (inndeling og kjenneteikn)
• variasjon og endring i dialektane dei siste tiåra

Ferdigheiter:

Kandidaten kan:

• identifisere sentrale språktrekk i eit språkhistorisk tekstmateriale
• identifisere relevante dialekttrekk i talemålstekstar
• identifisere utviklingslinjer frå norrønt til nyare talemål
• greie ut om sentrale sider ved norsk språkpolitikk og språkplanlegging etter 1814
• skrive rett og godt på nynorsk med relevant fagterminologi

Vurderingsordning:

- Semesteroppgåve på ca. 1500 ord. Denne delen tel 40 % av samla karakter.

- Skriftleg eksamen, 4 timar. Denne delen tel 60 % av samla karakter.

Dei to delane får kvar sin karakter, men på vitnemål og karakterutskrifter frå NTNU vil berre samla endeleg karakter stå. I den samla karakteren er deleksamenane vekta som oppgitt ovanfor. For at emnet skal vere greidd, må begge delane ha ståkarakter. Studentar som har stroke på semesteroppgåva, kan klage på karakteren og ta den skriftlege eksamenen, men dersom dei ikkje får medhald i klagen, blir den skriftlege eksamenen annullert.

Det er ikkje høve til å levere semesteroppgåve i semester når det ikkje er undervisning i emnet, med unntak for studentar som har gyldig forfall på semesteroppgåva. Det blir gjeve gjentakseksamen for skriftleg eksamen før neste ordinære eksamensperiode for studentar som har stått på semesteroppgåva. Ved seinare gjentak må begge deleksamenane takast på nytt.

Undervisningsformer: førelesingar, gruppeundervisning med obligatoriske øvingar.

Obligatorisk aktivitet:

• Minimum 75 % deltaking i fellesundervisninga
• Inntil 8 godkjente kortfatta øvingsoppgåver (skriftlege og/eller munnlege) med tilknyting til gruppeundervisninga.

I emnet skal studenten oppfylle eit obligatorisk arbeidskrav som består av inntil 8 kortfatta øvingsoppgåver. Dette er skriftlege og/eller munnlege øvingar som er knytte til gruppeundervisninga, og som blir vurderte til godkjent / ikkje godkjent. Meir informasjon og retningslinjer blir gitt ved semesterstart.

Fråværsgrensa skal dekkje normalt sjukdomsfråvær og liknande. Du får derfor ikkje gyldig forfall til undervisning på grunnlag av legeattest, sjølv om fråværet skyldast hindringar som du ikkje kan lastast for. I særlege tilfelle kan det gjerast avtale med emneansvarleg om unntak frå fråværsgrensa, helst ved semesterstart.

Krav til målform: Eksamen og obligatoriske øvingar skal skrivast på nynorsk.

Godkjend obligatorisk aktivitet er gyldig i to semester (semesteret godkjenninga blir gjeven og påfølgjande semester).