ENU804N Engelsk 2, emne 2 - Mangfold i språk, tekst og kultur

Ved fullført emne skal studenten ha følgjande læringsutbytte:

Kunnskap

Studenten

• har god kunnskap om grammatisk og fonologisk struktur i engelsk og om tileigning av ordforråd
• har kunnskap om engelske uttalevariantar og om kulturelle konvensjonar for munnleg språkbruk
• har kunnskap om interkulturell kompetanse
• har kunnskap om engelsk som verdsspråk og kva dette tyder for utviklinga av språkleg, kommunikativ og interkulturell kompetanse
• har kunnskap om fleirspråklegheit som ressurs i klasserommet
• har god kunnskap om samfunnsliv, historie og eit rikt utval kulturuttrykk i engelsktalande land, mellom anna sentrale verk i engelskspråkleg litteraturtradisjon
• har god kunnskap om struktur og språklege verkemiddel i tekstar, og om kritisk lesing
• kjenner til eit rikt utval songar, rim, litteratur, film og andre kulturelle uttrykk som kan brukast i undervisninga på mellom- og ungdomstrinnet
• har god kunnskap om vurderingspraksis som reiskap for læring, inkludert undervegsvurdering og elevmedverknad i vurderingsprosessar
• har djupare innsikt i ulike læringsaktivitetar, arbeidsmåtar og læremiddel i engelskopplæringa, inkludert digitale ressursar, og kunnskap om ulike måtar å organisere opplæringa på

Ferdigheiter

Studenten

• kan snakka og skriva engelsk sikkert og funksjonelt i ulike sjangrar og situasjonar
• kan munnleg og skriftleg analysere, tolka og samanlikne tekstar for born, ungdom og vaksne med omsyn til innhald, form og funksjon
• kan velja ut og leggje til rette for arbeid med engelskspråklege tekstar for born og ungdom på ein variert, utfordrande og inspirerande måte, samt bruka eit presist og tilpassa omgrepsapparat i arbeidet med tekstane
• kan leggje til rette for elevar si læring om og vidare utforsking av samfunnsliv, historie og kulturuttrykk i engelsktalande land med vekt på samanlikning med eigen kultur, blant anna i tverrfaglege prosjekt
• kan planleggje, organisere, gjennomføre og kritisk vurdera varierte og differensierte læringsaktivitetar, som fremjar djupnelæring, integrering av ulike språkferdigheiter, dei tverrfaglege temaa i engelskfaget og utviklinga av dei grunnleggjande ferdigheitene, inkludert digitale ferdigheiter
• kan leggje til rette for ein heilskapleg vurderingspraksis og bruka undervegsvurdering for å rettleia elevar i engelskopplæringa
• kan vurdera kritisk eigen fagleg praksis i høve til gjeldande læreplan i engelsk for grunnskulen

Generell kompetanse

Studenten

• har høg engelskspråkleg kompetanse
• kan reflektere kritisk over eiga læring og praksis i lys av etiske grunnverdiar og skulen sitt ansvar for personleg vekst og fagleg utvikling hos born og unge
• kan arbeida sjølvstendig og saman med andre for å identifisere, analysere og løyse problem knytt til engelskfaget
• kan vedlikehalde og utvikle eigen språkleg og didaktisk kompetanse og bidra til fagleg utvikling og nytenking

Studiet er reint nettbasert. Det vert nytta digitale ressursar og ulike arbeidsmåtar for å leggje til rette for varierte og studentaktive læringsformer og refleksjon kring kva digitale omgjevnader har å seie for læring i engelskfaget. Undervisnings- og læringsformene omfattar førelesing, individuelt arbeid, gruppearbeid, drøftingar, samskriving, multimodal tekstproduksjon og formativ vurdering. Det sentrale elementet i undervisninga er vekentlege nettmøte med faglærar. Kvar undervisningsøkt er på to timar. Det vert lagt vekt på erfaringsdeling og studentane sin eigen klasseromspraksis. Emnet inneheld eit didaktisk utviklingsprosjekt.

All undervisning i faget er på engelsk, og øving i både munnleg og skriftleg engelsk er sentralt i studentane sitt arbeid med faget. Det som vert formidla i undervisninga, kan komma i tillegg til det som står på pensumlista, og vert rekna som pensum. Ikkje alle tekstane vert gjennomgått, og ein må rekna med ein del sjølvstudium.

Kontakt emneansvarleg dersom du har spørsmål om pensum og undervisning.

Munnleg eksamen (digital) på engelsk, 30 minutt. Eksamen skal dokumentere fagkunnskap, munnleg engelskkompetanse og evne til refleksjon over faglege tema.

Karakterskala A-F, der F svarar til ikkje bestått.

Følgjande obligatoriske læringsaktivitetar må vera godkjende av faglærar før studenten kan framstille seg for eksamen:

1. Førebu, gjennomføra og evaluera kunnskapsdeling i eige kollegium. Studenten vel eit emne i anten språk- eller litteratur-/kulturdidaktikk. Emnet skal presenterast på engelsk for kollegaer og minst éin person frå leiinga.
2. Ei skriftleg oppgåve som skal presentere eit didaktisk utviklingsprosjekt knytt til anten språk- eller litteratur-/kulturdidaktikk. Studenten vel motsett fagområde av kollegapresentasjonen. Oppgåva skal skrivast på engelsk.

Retningslinjer vert gjevne for kvar læringsaktivitet. Minst ein av læringsaktivitetane må vera knytt til kunnskapsdeling i eige kollegium.

Dei obligatoriske læringsaktivitetane må vere godkjende av emneansvarleg seinast 2 veker før studenten kan framstille seg til eksamen. Dersom ein obligatorisk læringsaktivitet blir vurdert som ikkje godkjend, skal det bli gitt ei grunngjeving for dette. Studentar som ikkje får godkjend ein obligatorisk læringsaktivitet vil, så langt det let seg gjere innan fastsette fristar, få eit nytt forsøk i inneverande semester.